Gujarat : ગુજરાત સરકારે સરકારી કર્મચારીઓ માટે મોટો નિર્ણય લીધો છે. તમને જણાવી દઈએ કે, સરકારી કર્મચારીઓની હાજરીને લઈને એક મહત્વપૂર્ણ નિર્ણય લેવામાં આવ્યો છે. સરકારી કર્મચારીઓએ સમયસર ઓફિસ પહોંચવાનું રહેશે. હવે કર્મચારીઓએ દરરોજ સવારે 10.40 વાગ્યા સુધીમાં ઓફિસ પહોંચવું પડશે. ઓફિસ બંધ થવાનો સમય સાંજે 6:10નો રહેશે. જે કર્મચારીઓ સવારે મોડેથી અને સાંજે વહેલા નીકળે છે, તેમની રજા કાપવામાં આવશે. સામાન્ય વહીવટ વિભાગે આવા કર્મચારીઓની રજા અડધો દિવસ ઘટાડવાનો પણ નિર્ણય લીધો છે.
કર્મચારીઓ સમયસર સરકારી કચેરીઓમાં હાજર રહે તે માટે ગુજરાત સરકારે ‘ડિજિટલ એટેન્ડન્સ સિસ્ટમ’ લાગુ કરી હતી. સરકારે આ નિર્ણયનો અમલ અમુક કચેરીઓમાં જ કર્યો હતો. ત્યારે તમામ સરકારી કચેરીઓમાં તેનો અમલ કરવામાં આવશે તેમ જણાવાયું હતું. પરંતુ આજે રાજ્ય સરકારના સામાન્ય વહીવટ વિભાગે મોડા આવતા અને વહેલા ઘરે જતા કર્મચારીઓ માટે કડક નિર્ણય લીધો છે.
સરકારે પરિપત્ર બહાર પાડ્યો
ગુજરાત સરકાર દ્વારા અગાઉ એક પરિપત્ર બહાર પાડવામાં આવ્યો હતો. આ સરકારી પરિપત્ર મુજબ, સરકારી કચેરીઓમાં અધિકારીઓ અને કર્મચારીઓ તેમની હાજરીમાં નિયમિતતા અને શિસ્ત જાળવે, સરકારી કામમાં કાર્યક્ષમતા વધે અને કર્મચારીઓને તેમની ફરજો નિયમિત અને નિષ્ઠાપૂર્વક બજાવવા પ્રોત્સાહિત કરે તે સુનિશ્ચિત કરવા સરકારી કચેરીઓને જરૂરી સૂચનાઓ આપવામાં આવી હતી.
સરકારી કચેરીઓમાં કર્મચારીઓના મોડા અથવા અનિયમિત આગમન અંગેની અસંખ્ય ફરિયાદો અને મીડિયા અહેવાલોને પગલે, સરકાર લાંબા સમયથી સરકારી કચેરીઓમાં કર્મચારીઓની હાજરીને વધુ સારી રીતે અને વધુ સરળતાથી નિયંત્રિત કરવા અને મોડેથી આવતા અધિકારીઓ અને કર્મચારીઓ પર નજર રાખવા માટે ડિજિટલ હાજરી પ્રણાલી દાખલ કરવાનું વિચારી રહી હતી. હવે આ સંદર્ભમાં મોટો નિર્ણય લેવામાં આવ્યો છે અને કર્મચારીઓને સીધો સંદેશો આપવામાં આવ્યો છે.
Leave a Reply